மாதவிலக்கால் ஏற்படும் வலிக்கான சிறந்த சிகிச்சை எது?

மாதவிலக்கால் ஏற்படும் லேசானது முதல் மிதமானது வரையிலான வலிக்கு தனிநபரின் தேவைகளையும் வலியின் தீவிரத்தையும் பொறுத்து அதற்கேற்ற வீட்டு வைத்தியங்களையும் மாதவிலக்கு வலி நிவாரணிகளையும் சேர்த்து வழங்குவதே சிறந்த சிகிச்சை முறையாகும். கடுமையான அல்லது தொடர் வலிக்கு அல்லது ஆபத்தான அறிகுறிகளுடன் கூடிய வலிக்கு ஒரு பெண் மருத்துவ நிபுணரை அணுகுவது பரிந்துரைக்கப்படுகிறது.

மகப்பேறு மருத்துவரால் பரிந்துரைக்கப்படும் ஸ்டீராய்டு அல்லாத அழற்சி எதிர்ப்பு மருந்துகள் (NSAIDs) பலருக்கு மிகவும் பயனுள்ளதாக இருக்கின்றன. இந்த மருந்துகள் கருப்பைத் தசை சுருக்கங்களையும் வலியையும் ஏற்படுத்தும் ஹார்மோன் போன்ற பொருட்களான புரோஸ்டாக்லாண்டின்களின் உற்பத்தியைக் குறைப்பதன் மூலம் செயலாற்றுகின்றன. மருந்துகளுக்கு மேலதிகமாக எளிமையான மற்றும் எளிதில் பின்பற்றக்கூடிய வீட்டு வைத்தியங்களைப் பயன்படுத்தலாம். வெந்நீர் பாட்டில் அல்லது வெப்பமூட்டும் பேடைப் பயன்படுத்தி வயிற்றுப் பகுதியில் வெப்பம் அளிப்பது, யோகா அல்லது நடைப்பயிற்சி போன்ற மிதமான உடற்பயிற்சிகள் மற்றும் உணவுப் பழக்கவழக்கத்தில் மாற்றங்கள் ஆகியவை இதில் அடங்கும்.

இஞ்சியையும் குறுமிளகையும் சேர்த்து உட்கொள்வது அல்லது சீரகம், ஓமம் போன்ற பொருட்கள் சேர்த்த மூலிகைத் தேநீர் குடிப்பது போன்ற பாரம்பரிய வைத்திய முறைகள் அவற்றின் அழற்சி எதிர்ப்புப் பண்புகள் மற்றும் தசைப்பிடிப்பைக் குறைக்கும் செயல்திறனுக்காகவும் இந்தியாவில் பிரபலமாக உள்ளன.

இந்தியாவில் வளரிளம் வயதுப் பெண்களிலும் இளம் பெண்களிலும் 60-90 சதவீதம் பேர் மாதவிலக்கால் ஏற்படும் வலியால் பாதிக்கப்படுகின்றனர் என்று மதிப்பிடப்பட்டுள்ளது. இருந்தாலும் இந்தச் சிரமம் பெரும்பாலும், “மாதவிலக்கால் எல்லோருக்கும் வலி ஏற்படுவது இயல்புதான்” என்று கூறிப் புறக்கணிக்கப்படுகிறது.